El foro de la Madera convoca el primer concurso de ideas para obtener prototipos de viviendas construídas con este material

19 de diciembre, 2008

Os proxectos que se presenten deberán cumprir as Normas do Hábitat Galego e axustarse a un orzamento de execución material de 600€/m2. O Concurso tamén inclúe as categorías para mobiliario de espazos públicos, prototipos de naves agrícolas e forestais no medio rural e a categoría de rehabilitación
Santiago de Compostela, 26 xullo 2008.- O Foro da Madeira convoca o primeiro concurso de ideas para fomentar o uso da madeira no eido da construción, da creación de mobiliario para espazos públicos e da rehabilitación. Esta é a primeira iniciativa que emprende o recén constituído Foro da Madeira co obxectivo de promover unha nova cultura do uso da madeira en Galiza, que aposte pola competitividade do sector a nivel estatal e internacional.

O Foro de Madeira está integrado polas consellerías de Vivenda e Solo, Innovación e Industria e Medio Rural, xunto co CIS-Madeira, o Clúster da Madeira, FEARMAGA, Asociación Galega Monte-Industria e FECEG, que constituíron un foro de traballo e opinión aberto a todo tipo de empresas e institucións vinculadas ao sector.

Este concurso consta de catro categorías, a primeira está denominada Módulo Vivenda e ten como finalidade a obtención dun prototipo de vivenda unifamiliar. A superficie deste prototipo estará pensada para unha vivenda de entre 45 e 120 m2 que utilice a madeira como elemento estrutural e nos compoñentes construtivos da vivenda. A pretensión do Foro da Madeira é acadar un prototipo que permita a optimización da vivenda producida en serie. Os proxectos que se presenten deberán cumprir as Normas do Hábitat Galego e axustarse a un orzamento de execución material de 600€/m2.

O segundo módulo do concurso é definido como Mobiliario para espazos públicos. Esta categoría está pensada paraobter proxectos de mobiliario externo deseñado en madeira que poidan ser aptos para o seu uso en espazos públicos: prazas, xardíns, paradas de transporte… entre outros, que poderán instalarse no medio urbano e rural. Neste caso o Foro da Madeira valorará os proxectos que incorporen elementos innovadores e a súa facilidade de uso e mantemento.

A terceira modalidade do concurso está definido baixo o título de Unidades dotacionais no medio rural. Nesta categoría o Foro da Madeira quere obter un prototipo de nave gandeira e forestal, no que a madeira tamén terá que ser o elemento principal. Tamén se poden presentar propostas para almacéns, puntos de encontro das brigadas de incendios ou casetas de vixilancia.

Finalmente, a cuarta categoría do concurso é a Modalidade de rehabilitación en madeira, e poderán concursar edificios rehabilitados ou reconstruídos en Galiza, nos que a madeira tivese un papel predominante.

Prazo e lugar de admisión
Trátase dun concurso de ideas aberto e nunha soa fase. Tódalas persoas físicas ou xurídicas deberán facer a inscrición antes do 15 de agosto as 14.00 horas na sede do CIS-Madeira ubicada no Parque Tecnolóxico de Galicia, ou por fax ao número 988.36.81.53 e correo electrónico ao enderezo info@cismadeira.com.

Finalizado este prazo, elaborarase unha lista de admitidos que poderán realizar tódalas consultas que consideren pertinentes até o 14 de setembro no CIS-Madeira. O prazo limite para a presentación das propostas será o 31 de outubro de 2008. Tódolos traballos teñen que ser presentados baixo lema, para poder ser examinados polo xurado baixo anonimato. Os premios oscilan entre 1.000 e 6.000 € segundo a categoría á que se presenten.

Toda a documentación relacionada co concurso, poderase consultar na páxina web da Consellería de Vivenda e Solo (www.conselleriavivenda.xunta.es) e do CIS-Madeira (www.cismadeira.com).

Fuente: Consellería de Vivenda e Solo

Ir Arriba